धडा २: सूर्य, चंद्र आणि पृथ्वी

चंद्र स्वतःभोवती फिरतो (परिवलन) आणि पृथ्वीभोवतीही फिरतो (परिभ्रमण). दोन्ही फेऱ्यांना सारखाच वेळ लागतो, म्हणून आपल्याला चंद्राची एकच बाजू दिसते.

चंद्राच्या कला म्हणजे चंद्राचा प्रकाशित भाग जसा आपल्याला दिसतो तसे त्याचे वेगवेगळे आकार. अमावास्येपासून पौर्णिमेपर्यंत चंद्र वाढतो आणि पौर्णिमेपासून अमावास्येपर्यंत कमी होतो.

सूर्यग्रहणात चंद्र सूर्य आणि पृथ्वीच्या मध्ये येतो; चंद्रग्रहणात पृथ्वी सूर्य आणि चंद्राच्या मध्ये येते. ग्रहणात तिन्ही गोल एका रेषेत आणि एका प्रतलात असतात.

ग्रहण ही खगोलीय घटना आहे; त्यात शुभ किंवा अशुभ असे काही नाही. शास्त्रज्ञ ग्रहणाचा अभ्यास करतात आणि सूर्यग्रहण पाहताना डोळ्यांचे संरक्षण करणे आवश्यक असते.